Fomento adxudica a redacción do proxecto do tramo Requejo-A Veiga de Cascallá da A-76

Na sesión de control ao goberno na Comisión de Fomento do Congreso, celebrada na tarde do 29 de marzo, o deputado ourensán Celso Delgado Arce preguntaba ao secretario xeral de Infraestruturas, Manuel Niño, sobre a situación actual dos proxectos de estradas que ten en marcha o Ministerio de Fomento na provincia de Ourense.

Referíndose concretamente á autovía A-76 (Ourense-Ponferrada), Niño indicaba que se está traballando na redacción dos proxectos correspondentes aos tramos A Veiga de Cascallá e O Barco de Valdeorras e Villamartín de la Abadía e Requejo, xa na provincia de León. Prevese que estes proxectos se sometan a información pública no primeiro semestre deste ano para poder aprobalos definitivamente.

Con respecto ao tramo intermedio, entre Requejo (León) e A Veiga de Cascallá (Ourense), o secretario xeral de Infraestruturas anunciaba que a redacción do seu proxecto tiña sido adxudicada o pasado día 22, co que agora esperaban asinar o contrato de asistencia técnica para a redacción do proxecto nas próximas semanas e iniciar a súa redacción no primeiro semestre de 2017, “para o que se disporá da correspondente partida nos orzamentos xerais do estado de 2017”.

Ademais Manuel Niño falaba sobre a nova conexión das estradas N-120 e N-536 no Barco de Valdeorras, máis coñecida como estrada de circunvalación. Sinalaba que na actualidade estanse iniciando os traballos preliminares para o levantamento de actas previas á expropiación.